KSÍ VI þjálfaranámskeið 2015
Næsta haust mun Knattspyrnusamband Íslands halda KSÍ VI þjálfaranámskeið. Námskeiðið verður með breyttu sniði frá því sem áður hefur verið þar sem hluti þess verður hér á landi26.-27. september 2015 og hluti þess í Danmörku dagana 21.-27. október 2015.
Útlistun á umsóknarferli og uppbygging námskeiðsins í grófum dráttum er sem hér segir:
- Allir þjálfarar sem sækja um þurfa að taka KSÍ A þjálfaraskólann (viðhengi). Þjálfarar þurfa að ljúka Þjálfaraskólanum í síðasta lagi föstudaginn 21. ágúst. Þjálfaraskóli KSÍ kostar 15.000 kr.
- Umsækjendur þurfa jafnframt að hafa lokið KSÍ V þjálfaranámskeiði. Hins vegar geta þeir þjálfarar sem eiga eftir að taka KSÍ V námskeið gert það helgina 9.-11. Október 2015og verið þar með gjaldgengir á KSÍ VI námskeiðið. Þeir þjálfarar þurfa samt sem áður að skila inn umsókn fyrir tiltekin tíma og taka Þjálfaraskólann.
- Umsóknarfrestur er til föstudagsins 28. ágúst. Reiknað er með að fleiri þjálfarar sæki um námskeiðið en hægt er að taka inn. Umsækjendur þurfa því að fylla út umsóknareyðublað (viðhengi). Fræðslunefnd KSÍ mun svo í kjölfarið velja 20-24 þjálfara til þátttöku á námskeiðinu.
- Hópurinn sem valinn verður mun svo hittast helgina 26.-27. september. Þá helgi verður námskeið í leikgreiningu þar sem leikgreindur verður leikur í Pepsi-deild karla og þátttakendur fá kennslu á Sideline hugbúnaðinum. Þátttakendur fá sinn eigin aðgang að Sideline analyzer í þrjá mánuði og Sideline organizer í eitt ár og er það innifalið í námskeiðgjaldinu.
- Miðvikudaginn 21. október verður haldið til Kaupmannahafnar. Námskeiðið að þessu sinni verður í Farum í útjaðri Kaupmannahafnar þar sem gist verður á hóteli sem staðsett er á keppnisvelli FC Nordsjælland. Heimsóttir verða tveir klúbbar í ferðinni, en í nágreninu eru einnig FC Köbenhavn og Bröndby IF, auk þess sem aðilar frá danska knattspyrnusambandinu munu kenna hluta námskeiðsins.
- Hluti af námskeiðinu verður helgaður áætlunargerð. Þátttakendur þurfa að vinna æfingaáætlun fyrir sitt lið og skiladagur er 20. desember 2015.
- Þremur vikum eftir að heim er komið verður skriflegt próf þar sem prófað er úr námsefni af KSÍ V og KSÍ VI.
KSÍ VI þjálfaranámskeiðið er hluti af UEFA A þjálfaragráðunni en þjálfarar í Pepsi-deildum karla og kvenna, 1. deild karla og yfirþjálfarar unglingastarfs félaga í þessum deildum þurfa að hafa UEFA A þjálfaragráðu samkvæmt reglugerð KSÍ um menntun þjálfara og kröfu leyfisnefndar KSÍ.
Í viðhengi er umsókn að KSÍ VI þjálfaranámskeiðinu, stigalistinn sem notaður er til hliðsjónar við val inn á námskeiðið, dagskrá síðasta KSÍ VI námskeiðs, upplýsingar um Þjálfaraskóla KSÍ og reglugerð KSÍ um menntun þjálfara. Upplýsingar um Hotel Farum Park má finna hér: http://www.fcnhotel.dk/
KSÍ vekur athygli á því að síðasti dagur til að skila inn umsókninni er 28. ágúst næstkomandi, en auðvitað má skila umsóknum fyrr. Ljúka þarf KSÍ A þjálfaraskólanum í síðasta lagi 21. ágúst.
Námskeiðið kostar 290.000 kr.
Fræðslunefnd KSÍ stefnir á að taka 20-24 þjálfara inn á námskeiðið.
Á námskeiðinu er 100% mætingarskylda og það er bæði bóklegt og verklegt. Þátttakendur gætu þurft að taka þátt í verklegum tímum. Á námskeiðinu kenna kennarar frá KSÍ og erlendir fyrirlesarar. Hluti námskeiðsins fer fram á ensku.
Dagskrá námskeiðsins er í vinnslu og verður gefin út þegar nær dregur.
Allar nánari upplýsingar um námskeiðið veita Dagur Sveinn Dagbjartsson í dagur@ksi.is og Arnar Bill Gunnarsson í arnarbill@ksi.is
Smelltu hérna til að sækja gögn vegna námskeiðsins.
.jpg?proc=760){kind=logo}
