A karla - Allir leikmenn með á æfingu dagsins
Eins og kunnugt er þá er íslenska karlalandsliðið statt í Orlando þessa dagana þar sem leiknir verða tveir vináttulandsleikir við Kanada, 16. og 19. janúar. Eftir langt ferðalag í gær þá var fyrsta æfingin í dag þar sem menn hristu ferðaþreytuna úr sér og voru allir leikmenn hópsins með á æfingunni.
Ennfremur voru tveir fundir haldnir í dag auk þess sem að nýir leikmenn voru boðnir velkomnir í hópinn en fimm leikmenn hafa ekki verið í landsliðshópnum áður.
Æft var á æfingasvæði University of Central Florida (UCF) en leikirnir tveir fara fram á keppnisvelli knattspyrnuliðs skólans. Skólasvæðið er í nágrenni við hótel íslenska liðsins, í innan við 10 mínúta akstur. Þessi skóli er næstfjölmennasti háskóli Bandaríkjanna, á eftir hinum kunna Arizona State University, með ríflega 60.000 nemendur. Aðstæður eru allar hinar bestu á svæðinu til íþróttaiðkana en í næsta nágrenni við æfingavöllinn sem íslenska liðið æfði á má finna m.a. hafnaboltaleikvang, mjúkboltaleikvang, frjálsíþróttahús og frjálsíþróttavöll, körfuboltahöll, líkamsræktarhöll að ógleymdum 45.000 manna leikvangi fyrir amerískan fótbolta.
Aðstæður til knattspyrnuiðkunar voru góðar í dag, skýjað og um 18 stiga hiti og má búast við slíku veðri næstu daga að viðbættum einhverjum rigningarskúrum.
Þess má geta að fleiri knattspyrnulið eru um þessar mundir í Orlando heldur en landslið Íslands og Kanada. Þýsku félögin Bayern Leverkusen og Köln nýta fríið í sínu heimalandi til æfinga hér ásamt brasilísku félögunum Fluminese og Corinthias. Mætast þýsku og brasilísku félögin innbyrðis á fimmtudag og laugardag.
Fleiri myndir má finna á Facebook síðu KSÍ.
.jpg?proc=760)
.jpg?proc=760)
