Danir höfðu betur með minnsta mun
Það voru Danir sem tryggðu sér sæti í úrslitakeppni EM í kvöld eftir að Ísland og Danir gerðu jafntefli, 1 - 1. Fyrri leiknum lauk með markalausu jafntefli og því komust Danir áfram á útivallamarkinu. Danir komust yfir á 90. mínútu en Hólmbert Aron Friðjónsson jafnaði metin úr vítaspyrnu í uppbótartíma.
Danir réðu ferðinni lengst af í leiknum og snemma leiks varði Fredrik Schram frábærlega skalla gestanna. Fredrik stóð í markinu eftir að Rúnar Alex Rúnarsson reyndist ekki leikfær eftir upphitun. Danir sóttu stíft að marki Íslands fyrri hluta hálfleiksins en meira jafnvægi kom í leikinn þegar leið á.
Seinni hálfleikurinn var jafnari þó svo að gestirnir hafi ráðið ferðinni. Íslendingar héldu að þeir hefðu komist yfir seint í leiknum en markið var dæmt af. Það var svo á 90. mínútu að Danir skoruðu eftir langt innkast. Sverrir Ingi Ingason var svo felldur innan vítateigs stuttu síðar og Hólmbert skoraði úr vítinu. Tíminn reyndist of naumur og Danirnir fögnuðu sætinu í Tékklandi innilega.
Vonbrigðin voru gríðarlega mikil hjá íslensku strákunum enda voru þeir grátlega nærri Tékklandi í þetta skiptið. Frammistaðan var hinsvegar til fyrirmyndar og baráttan og liðsheildin í liðinu til eftirbreytni.
.jpg?proc=760)
.jpg?proc=760)
