Ívar Orri dæmir í Færeyjum - Finnskir og færeyskir dómarar dæma hér á landi
Eins og undanfarin ár standa norrænu knattspyrnusamböndin að dómaraskiptum þar sem efnilegum dómurum gefst kostur á því að dæma í öðrum löndum. Ívar Orri Kristjánsson mun í kvöld dæma leik EB/Streymur II og NSÍ II í næst efstu deild í Færeyjum og hann verður aftur á ferðinni á sunnudaginn þegar hann dæmir leik B68 og Víkings í efstu deild karla.
Erlendir dómarar verða einnig á ferðinni hér á landi á laugardaginn í 1. deild karla. Í Ólafsvík verða finnskir dómarar að störfum á leik Víkings Ólafsvíkur og Tindastóls. Jani Laaksonen dæmir leikinn og annar aðstoðardómari hans er landi hans, Veli-Matti Leppänen. Í Laugardalnum verða svo færeyskir dómarar á leik Þróttar og HK. Rúni Gaardbo dæmir leikinn og annar aðstoðardómari hans verður hinn færeyski Edvard Hojgaard.
