U17 karla í Belfast: Fimm marka sigur á Færeyingum
U17 landslið karla, skipað leikmönnum fæddum 1998 og síðar, vann öruggan 5-0 sigur í lokaleik sínum í sérstöku undirbúningsmóti UEFA sem fram fór í Belfast á Norður-Írlandi. Íslenska liðið hafnaði því í þriðja sæti með þrjú stig, eftir eins marks töp í leikjum gegn Wales og Norður-Írlandi.
Eins og tölurnar gefa til kynna var sigur íslenska liðsins verðskuldaður og öruggur og voru mörkin í leiknum hvert öðru glæsilegra. Tvö þeirra komu í fyrri hálfleik, með tveggja mínútna millibili, á 53. og 37. mínútu. Fyrst skoraði Dagur Austmann Hilmarsson með fallegum skalla eftir hornspyrnu, og svo skoraði Sveinn Aron Guðjohnsen með flottu skoti beint úr aukaspyrnu neðst í markhornið. Viktor Júlíusson náði þriggja marka forystu þegar hann skoraði með glæsilegu skoti utan teigs á 70. mínútu, óverjandi í markhornið. Kristófer Konráðsson skoraði fjórða markið á 74. mínútu með hörkuskoti utan teigs, boltinn fór í stöngina og inn. Erlingur Agnarsson innsiglaði svo 5-0 sigur þegar hann fékk stungusendingu inn fyrir vörnina og kláraði færið vel.
