Velskur 3-1 sigur í Cardiff
Það er óhætt að segja að dýrasti knattspyrnumaður heims, Gareth Bale, hafi átt góðan dag í Cardiff þegar Wales mætti Íslandi í vináttulandsleik. Bale, sem leikur eins og kunnugt er með Real Madrid á Spáni, lagði upp tvö fyrstu mörk heimamanna og skoraði svo það þriðja í 3-1 sigri á Íslendingum.
Heimamenn voru sterkari framan af fyrri hálfleik og náðu forystunni með skallamarki frá James Collins. Bale tók þá aukaspyrnu frá hægri kanti og sendi hann í átt að vítapunktinum, þar sem Collins sneiddi knöttinn í fjærhornið framhjá Hannesi Þór Halldórssyni í íslenska markinu. Þegar leið á fyrri hálfleikinn fór íslenska liðið að ná góðu samspili og var sterkari aðilinn. Jóhann Berg Guðmundsson jafnaði metin á 27. mínútu með vinstri fótar skoti úr vítateignum, sem hafði viðkomu í varnarmanni á leið sinni í netið.
Lið Wales var sterkara í seinni hálfleik þó íslenska liðið hafi átt ágæta spretti. Títtnefndur Bale sýndi að hann er heimsklassa leikmaður og var maðurinn á bak við annað mark Wales-manna. Hann ógnaði íslenska markinu á 64. mínútu og náði skoti sem var varið á marklínu, en Sam Vokes var fyrstur að átta sig og stangaði boltann í netið af mjög stuttu færi. Næst reif Bale lausan á 70. mínútu, skeiðaði upp allan völlinn og skoraði með hnitmiðuðu vinstri fótar skoti í markhornið.
Fátt markvert gerðist eftir þetta, þó Ísland hafi verið nærri því að skora í blálokin þegar skalli eftir hornspyrnu var varinn á marklínu.
Næsti leikur A landsliðs karla er vináttuleikur við Austurríki í Innsbrück þann 30. maí.
.jpg?proc=760)
.jpg?proc=760)
