Tveir léku ólöglegir með Selfossi gegn Víkingi R,
Tveir leikmenn léku ólöglegir með Selfossi í Lengjubikarnum þann 23. febrúar síðastliðinn, þegar Selfyssingar mættu Víkingi R. Í samræmi við reglugerð um deildarbikarkeppni standa úrslit leiksins óbreytt, en Selfossi er gert að greiða sekt.
Í reglugerðum KSÍ um deildarbikarkeppni karla og kvenna, greinum 10.1 og 11.2 segir:
10. SEKTIR
10.1 Lið, sem mætir ólöglega skipað til leiks, skal sæta sekt að upphæð kr. 30.000 og að auki kr. 30.000 fyrir hvern leikmann sem ekki hefur keppnisleyfi með viðkomandi félagi og tekur þátt í leiknum. Félag, sem notar leikmann, þjálfara eða forystumann í leikbanni, skal sæta sektum að upphæð kr. 100.000.
11. STJÓRN KEPPNINNAR
11.2 Félag, sem notar leikmann sem ekki hefur keppnisleyfi með því eða notar leikmann, þjálfara eða forystumann í leikbanni, telst hafa tapað leiknum með markatölunni 0-3 nema tap hafi verið stærra, þá skal sú markatala ráða. Staðfesti skrifstofa KSÍ að þátttakandi hafi verið óhlutgengur í leik skal mótanefnd þegar í stað skrá úrslit leiksins skv. ofangreindu og tilkynna það viðkomandi félögum. Heimilt er að kæra slíka skráningu til aga- og úrskurðarnefndar KSÍ og skal kærufrestur telja frá þeim degi sem tilkynningin er gefin út.
Neðangreindir leikmenn léku ólöglegir með Selfossi:
- Nafn leikmanns: Arnór Ingi Gíslason / Hafþór Ingi Ragnarsson
- Leikur: Víkingur R. – Selfoss
- Dagsetning: 23. febrúar 2014
- Ástæða: Leikmennirnir eru skráðir í Árborg
Í samræmi við ofangreinda reglugerð standa úrslit óbreytt (4-0), en Selfoss er sektað um kr. 90.000.-
.jpg?proc=760)
