A karla - Hópurinn sem mætir Svíum í Abu Dhabi
Lars Lagerbäck og Heimir Hallgrímsson, landsliðsþjálfarar, hafa valið hópinn sem mætir Svíum í vináttulandsleik í Abu Dhabi, þriðjudaginn 21. janúar næstkomandi. Það eru 20 leikmenn sem skipa hópinn að þessu sinni, þar af eru 5 leikmenn sem ekki hafa leikið A landsleik.
Ekki er um alþjóðlegan landsleikjadag að ræða og er því landsliðshópurinn samansettur af leikmönnum sem leika með félagsliðum hér á landi og á Norðurlöndunum.
Íslendingar og Svíar hafa mæst fimmtán sinnum hjá A landsliðum karla og hafa Svíar haft betur í ellefu skipti, tvisvar hafa þjóðirnar skilið jafnar og tvisvar hafa Íslendingar farið með sigur af hólmi. Síðast mættust þjóðirnar í vináttulandsleik á Gamla Ullevi í maí 2012 og þá höfðu heimamenn betur, 3 – 2.
Leikið verður í Sameinuðu Arabísku Furstadæmunum, á Mohammed Bin Zayed leikvanginum í Abu Dhabi, sem tekur 42.056 manns í sæti. Leikvangurinn, sem ber nafn krónprinsins í landinu, var opnaður árið 2009 og er heimavöllur knattspyrnuliðsins Al Jazira Club, en þjálfari þess liðs er hinn kunni Ítali Walter Zenga.
Leikurinn fer fram þann 21. janúar næstkomandi kl. 20:00 að staðartíma, sem er kl. 16:00 að íslenskum tíma.
Smelltu hérna til að horfa á viðtal við Heimi Hallgrímsson, landsliðsþjálfara, um verkefnið.
