U19 kvenna - Annar stórsigur hjá stelpurnum
Stelpurnar í U19 unnu annan stórsigur í dag í undankeppni EM en leikið er í Búlgaríu. Mótherjarnir í dag voru frá Slóvakíu og unnu okkar stelpur öruggan sigur, 5 - 0. Með þessum sigri er íslenska liðið öruggt með sæti í milliriðlum.
Stelpurnar byrjuðu af sannkölluðum krafti og Telma Hjaltalín Þrastardóttir skoraði fyrsta mark leiksins strax á fyrstu mínútu. Fyrirliðinn Hildur Antonsdóttir bætti svo öðru marki við á 10. mínútu og mörkin urðu ekki fleiri í fyrri hálfleiknum. Telma bætti öðru marki sínu við á 52. mínútu og þær Svava Rós Guðmundsdóttir og Elín Metta Jensen bættu við mörkum áður en leikurinn var allur.
Þetta er annar 5 - 0 sigur liðsins á mótinu en lokaleikurinn er gegn Frökkum á fimmtudaginn og ræðst þá hvaða þjóð endar í efsta sæti riðilsins. Frakkar lögðu Búlgari í dag, 7 - 0, og eru því í efsta sæti á markatölu.
