Jafntefli í hörkuleik gegn Skotum hjá U19 karla
U19 landslið karla gerði í kvöld, þriðjudagskvöld, 1-1 jafntefli við Skota í æfingaleik í Stirling í Skotlandi. Bæði mörk leiksins komu beint úr aukaspyrnum, en það fyrra gerði Oliver Sigurjónsson á 22. mínútu. Jöfnunarmark skoska liðsins kom í síðari hálfleik, á 57. mínútu.
Skotar voru betri framan af leik, en íslenska liðið vann sig smám saman inn í leikinn og náði forystunni. Leikurinn var vel leikinn af báðum liðum, sem sýndu getu sína í hröðum og skemmtilegum leik. Skotar fengu fleiri færi í leiknum, en þó var heilt yfir jafnræði með liðunum.
Frammistaða íslenska liðsins var með ágætum, enda má taka tillit til þess að hópurinn ferðaðist samdægurs til Skotlands. Þessi lið mætast aftur á fimmtudag, á sama stað, og hefst leikurinn kl. 10:00 að íslenskum tíma.
.jpg?proc=760)
.jpg?proc=760)
