U16 kvenna - Jafntefli gegn Færeyingum
Stelpurnar í U16 kvenna gerðu í dag jafntefli við stöllur sínar frá Færeyjum en þetta var lokaleikur liðsins á undirbúningsmóti UEFA sem fram fór í Wales. Lokatölur urðu 2 - 2 en Færeyingar leiddu 2 - 1 í leikhléi.
Það voru þær færeysku sem byrjuðu leikinn af krafti. Þær komust yfir á 12. mínútu með marki bein úr aukaspyrnu og bættu við öðru marki á 23. mínútu leiksins. Sara Skaptadóttir minnkaði muninn með góðu marki á lokamínútu fyrri hálfleiks. Íslenska liðið sótti svo stanslaust í síðari hálfleiknum og jafnaði Arna Dís Arnþórsdóttir metin á 53. mínútu. Þrátt fyrir mikla sókn tókst íslenska liðinu ekki að innbyrða sigur og Færeyingar fögnuðu sínu fyrsta stigi á mótinu.
Íslenska liðið endaði því mótið með fimm stig, sigur gegn Wales og jafntefli gegn Norður Írum og Færeyjum. Í hinum leik dagsins gerðu Wales og Norður Írar 1 - 1 jafntefli. Norður Írar eru því með fimm stig, líkt og Íslendingar, en með betra markahlutfall og enda því í efsta sæti.
.jpg?proc=760)
.jpg?proc=760)
