Sigurður Ragnar - "Frábært vinnuframlag leikmanna"
"Virkilega ánægður með vinnuframlag leikmanna í þessum leik. Liðið í heild varðist mjög vel í þessum leik og spilaði taktískt mjög vel" sagði Sigurður Ragnar Eyjólfsson, landsliðsþjálfari kvenna, þegar hann var spurður um hans hugsanir um leikinn gegn Svíum í kvöld þar sem íslenska liðið beið lægri hlut, 2 - 0..
"Svíar eru með mjög sterkt lið og líklega ein af fjórum þjóðum sem eiga mesta möguleika á því að vinna EM í sumar." Okkur vantaði marga lykilmenn í liðið og vorum að prófa nýja leikaðferð, 4-4-2. Varnarvinnslan var verulega góð en við þurfum að vinna betur í sóknarleiknum, hefðum getað gert betur í nokkur skipti á því sviði í kvöld."
Munurinn á þessum leik og síðasta leik gegn Svíum fyrir um mánuði síðan?
"Taktískt var þetta miklu, miklu betra en á Algarve. Svíar eru mjög hreyfanlegar, duglegar að hreyfa sig án bolta en við náðum að loka svæðum svo þær náðu ekki upp sínu spili. Talandinn, hreyfingin og baráttan í liðinu var allt önnur en í síðasta leik og sannarlega eitthvað sem hægt er að byggja mjög á."
Nú var 18 ára aldursmunur á miðvörðum liðsins í kvöld. Hverning fannst þér þessar tvær kynslóðir vinna saman?
"Þær unnu mjög vel saman, þær voru að spila á móti framherjum á heimsmælikvarða og höfðu góð tök á þeim. Glódís spilaði eins og hún væri miklu eldri. Hún hefur ekki leikið marga landsleiki með okkur en tók á sig mikla ábyrgð og hefur tekið framförum með hverjum leiknum. Katrín nýtti alla sína reynslu í þessum leik og gott fyrir Glódísi að hafa hana sér við hlið. Það vantar lykilmenn í hópinn núna og við megum ekki við miklum skakkaföllum. Hinsvegar er ég mjög ánægður með þá leikmenn sem komu inn í liðið í þeirra stað og margar sem gera tilkall til sætis í hópnum fyrir sumarið" sagði Sigurður Ragnar eftir leikinn í kvöld.
