U21 karla - Æft á gervigrasi í Minsk
Strákarnir í U21 landsliðinu eru nú staddir í Minsk í Hvíta Rússlandi en framundan er leikur gegn heimamönnum í undankeppni EM. Þetta er fyrsti leikur riðilsins en ásamt þessum þjóðum skipa Frakkar, Armenar og Kasakar þennan riðil.
Leikurinn við Hvít Rússa hefst kl. 13:00 að íslenskum tíma á morgun, þriðjudag, en kalt er í Minsk þessa dagana og mikið hefur snjóað. Liðið æfði í morgun á gervigrasi en ekki er hægt að æfa á keppnisvellinum þar sem verið er að hlífa honum vegna mikillar snjókomu síðustu daga. Engu að síður fer vel um hópinn í Minsk og verður spennandi að fylgjast með þessu unga liði spreyta sig gegn heimamönnum á morgun. Fylgst verður með leiknum á Facebook síðu KSÍ.
