Hannes Þ. Sigurðsson sérstaklega heiðraður
Á ársþingi KSÍ síðastliðinn laugardag var Hannes Þ. Sigurðsson sérstaklega heiðraður fyrir sín störf innan knattspyrnuhreyfingarinnar. Hannes hefur komið víða við í hreyfingunni sem hefur fengið að njóta krafta hans á mörgum sviðum.
Hannes hefur verið skoðunarmaður reikninga hjá Knattspyrnusambandinu í 60 ár en hefur nú hætt sem slíkur. Hannes var einn fremsti dómari landsins um árabil og hefur einnig síðan starfað sem eftirlitsmaður dómara í fjölda ára.
Það var Ellert B. Schram, fyrrum formaður KSÍ og ÍSÍ, sem afhenti Hannesi viðurkenningarvott frá Knattspyrnusambandinu en Hannes var sæmdur æðsta heiðursmerki KSÍ, heiðurskrossnum, árið 2007.
Mynd: Þessir þrír hafa allir komið mikið við sögu í knattspyrnunni. Lengst til hægri er Hannes Þ. Sigurðsson eldri. Sonur hans, Sigurður Hannesson er lengst til vinstri og á milli þeirra er sonurinn og sonarsonurinn, Hannes Þ. Sigurðsson yngri. Myndin er tekin árið 2000 eftir að Hannes yngri skoraði fjögur mörk í 4 - 1 sigri FH á KR í úrslitaleik bikarkeppni 2. flokks.