U21 karla - Tap gegn Wales í vináttulandsleik
Strákarnir U21 biðu lægri hlut gegn Wales í dag í vináttulandsleik sem leikinn var í Llanelli. Lokatölur urðu 3 - 0 fyrir heimamenn og komu öll mörkin á 10 mínútna kafla undir lok leiksins.
Heimamenn byrjuðu leikinn betur en eftir 10 mínútna leik komst íslenska liðið betur inn í leikinn og jafnræði var með liðunum það sem eftir lifði fyrri hálfleiksins. Heldur var fyrri hálfleikurinn tíðindalítill því færin létu á sér standa.
Síðari hálfleikurinn var hinsvegar að mestu í eigu íslenska liðsins framan af. Arnór Ingvi komst einn í gegn en markvörður Wales sá við honum. Um miðbik hálfleiksins fengu svo strákarnir þrjú fín færi á tveggja mínútna kafla en náðu ekki að reka endahnútinn á sóknirnar. Það var því gegn gangi leiksins að heimamenn komust yfir á 79. mínútu eftir hraða sókn upp miðju vallarins. Eftir þetta tóku þeir svo öll völd á vellinum og bættu við laglegu marki þremur mínútum síðar og ráku svo smiðshöggið á góðan lokakafla á 89. mínútu leiksins.
Sérstaklega svekkjandi lokakafli, eftir ágætan síðari hálfleik hjá íslenska liðinu. Næsta verkefni liðsins er svo 26. mars þegar liðið hefur leik í undankeppni EM 2015. Mótherjarnir þá verða Hvíta Rússland og verður leikið ytra.
