Stórt skref stigið í átt til Svíþjóðar
Íslenska kvennalandsliðið steig í dag stórt skref í átt að sæti í lokakeppni EM 2013 í Svíþjóð næsta sumar. Skrefið var stigið með því að leggja Úkraínu 3-2 í Sevastopol í fyrri umspilsleik liðanna. Seinni leikurinn fer fram á Laugardalsvelli fimmtudaginn 25. október og eru allir sem vettlingi geta valdið skyldugir til að mæta.
Íslenska liðið virðist hafa komið heimamönnum á óvart í byrjun leiks því Katrín Ómarsdóttir skoraði eftir aðeins fimm mínútur og Hólmfríður Magnúsdóttir kom Íslandi tveimur mörkum yfir eftir 25 mínútna leik. Úkraína náði smám saman að vinna sig inn í leikinn og náði að minnka muninn á 39. mínútu.
Síðari hálfleikur var afar fjörugur, eins og sá fyrri, og úkraínska liðið hélt áfram mikilli pressu að íslenska markinu, sem lauk með jöfnunarmarki á 51. mínútu. Baráttan var áfram í fyrirrúmi hjá okkar stelpum, sem náðu ró á sinn leik og Margrét Lára Viðarsdóttir skoraði á 64. mínútu. Þetta reyndist vera sigurmark leiksins og því er ljóst að EM-sætið er innan seilingar.
Til þess að draumurinn verði að veruleika og að Ísland komist á EM í annað sinn í röð þarf íslenska liðið þó að leika vel í síðari leiknum. Úkraína er með sterkt lið sem ætlar sér ekkert annað en sigur í Laugardalnum á fimmtudag. Stelpurnar þurfa stuðning allra sem eiga þess nokkurn kost að mæta. Við ætlum á EM, öll saman. Miðasalan er í fullum gangi á http://www.midi.is/. Allir á völlinn!
