Fyrsti leikur sovéska kvennalandsliðsins fór fram í Sevastopol
Íslenska kvennalandsliðið mætir því úkraínska í fyrri umspilsleik þjóðanna um sæti í úrslitakeppni EM sem fram fer í Svíþjóð á næsta ári. Leikið verður í hafnarborginni Sevastopol sem er sunnarlega í Úkraínu, við Svartahafið.
Vel fer um íslenska liðið í Sevastopol og aðstæður þar til fyrirmyndar. Þessi næst stærsta hafnarborg Úkraínu kom mikið við sögu í seinni heimstyrjöldinni, þurfti að þola miklar loftárásir á stríðsárunum, en hún hefur líka komið við sögu í knattspyrnusögunni. Í apríl árið 1990 lék sovéska kvennalandsliðið sinn fyrsta leik á heimavelli og var sá leikur leikinn í Sevastopol. Leikið var við Noreg og lauk hann með markalausu jafntefli en tveimur vikum áður lék sovéska kvennalandsliðið sinn fyrsta landsleik í sögunni, gegn Búlgaríu.
