Leikmaður Keflavíkur áminntur vegna ummæla
Í samræmi við starfsreglur nefndarinnar ákvað Aga- og úrskurðarnefnd KSÍ á fundi sínum 4. september 2012 að áminna Guðmund Steinarsson vegna ummæla hans í fjölmiðlum eftir leik Keflavíkur og Vals í Pepsi-deild karla sem fram fór mánudaginn 27. ágúst.
Framkvæmdastjóri KSÍ vísaði ummælum Guðmundar til aga- og úrskurðarnefndar í samræmi við 18. grein reglugerðar KSÍ um aga- og úrskurðarmál.
Aga- og úrskurðarnefnd KSÍ vill að lokum minna á nauðsyn þess að grein 1.4 í reglugerð KSÍ um knattspyrnumót verði í heiðri höfð, en þar segir: Félög, iðkendur, forystumenn og aðrir skulu jafnan sýna drengskap og forðast hvaðeina sem rýrt gæti álit almennings á íþróttinni og koma fram af hollustu, heiðarleika og sönnum íþróttaanda. Þeir sem taka þátt í starfi knattspyrnuhreyfingarinnar skulu leitast við að gera ekkert það sem til vanvirðu má telja fyrir íþróttina.
