• fim. 28. jún. 2012
• Fræðsla

Átak UEFA í markaðsmálum kvennaknattspynu

Dagana 24. til 26. júní voru staddir hér á landi fulltrúar UEFA og Triple Double, sem er hollenskt ráðgjafafyrirtæki með sérhæfingu í kostunarsamningum og markaðsmálum í íþróttum, og er með verkefni víðs vegar um heiminn.  Heimsóknin var í tengslum við UEFA Women´s Marketing Programme, sem er nýtt verkefni á vegum UEFA og miðar að því að styðja við knattspyrnusambönd í uppbyggingu og styrkingu markaðs- og kynningarstarfs í deildarkeppni í aðildarlöndum UEFA. 

Ísland er eitt af átta löndum sem þessi starfshópur heimsækir í sama tilgangi (meðal annarra landa eru Skotland, Danmörk og Finnland).  Markmiðið er tvíþætt – annars vegar að styðja knattspyrnusambönd viðkomandi landa við markaðs- og kynningarstarf á kvennaknattspyrnu (með áherslu á deildarkeppni) og hins vegar að safna upplýsingum frá þessum löndum með það fyrir augum að setja saman handbók sem hægt er að nota sem bestun (benchmarking) fyrir knattspyrnusambönd sem hafa ekki náð jafn langt í uppbyggingu á kvennaknattspyrnu.

Í heimsókn UEFA hingað til lands var farið um víðan völl, mikil söfnun upplýsinga fór fram og greining á stöðu og umhverfi kvennaknattspyrnu í landinu, sérstaklega m.t.t. Pepsi-deildar kvenna. 

Fulltrúar UEFA og Triple Double fóru á einn leik í Pepsi-deild kvenna (Stjarnan-Afturelding sunnudaginn 24. júní)  til að kynna sér umgjörð leikja, funduðu með hagsmunaaðilum utan knattspyrnuhreyfingarinnar (fulltrúa fjölmiðla og kostunaraðila deildarinnar) og ræddu ítarlega við fulltrúa KSÍ. 

Þá var einnig fundað með fulltrúum félaga í Pepsi-deild kvenna.  Á þeim fundi, sem var afar gagnvirkur, skiptust aðilar á skoðunum og hugmyndum og var ljóst að stuðningur fulltrúa félaganna við allar aðgerðir tengdar þessu verkefni til að auka aðsókn er og verður mikill.

Fulltrúar félaga á fundi 25. júní

Félag	Nafn	Staða / Hlutverk
Breiðablik	Atli Sigurðarson	Framkvæmdastjóri knattspyrnudeildar
FH	Árni Guðmundsson	Formaður meistaraflokksráðs kvenna
FH	Gunnar Gunnarsson	Framkvæmdastjóri knattspyrnudeildar
Fylkir	Ásgeir Ásgeirsson	Formaður knattspyrnudeildar
Fylkir	Jón Óli Sigurðsson	Gjaldkeri knattspyrnudeildar
Fylkir	Ólafur Björgvin Pétursson	Formaður meistaraflokksráðs kvenna
ÍBV	María Guðjónsdóttir	Fulltrúi kvennaráðs
Stjarnan	Einar Páll Tamimi	Formaður meistaraflokksráðs kvenna
Valur	Benóný Valur Jakobsson	Formaður meistaraflokksráðs kvenna
Valur	Haraldur Daði Ragnarsson	Framkvæmdastjóri
Þór/KA	Nói Björnsson	Formaður meistaraflokksráðs kvenna

Þrjú félög í Pepsi-deild kvenna – Afturelding, KR og Selfoss – áttu ekki fulltrúa á fundinum.

Í lok heimsóknarinnar kynntu fulltrúar Triple Double samantekt og niðurstöður fyrir fulltrúum KSÍ og kynntu jafnframt næstu skref í verkefninu.  Markmið verða skilgreind síðar í ferlinu, í samstarfi við félögin og aðra hagsmunaaðila, þegar greiningarvinnu er lokið. 

Meðal atriða sem má nefna hér eru að á kvennalandsleik í september verður unnið könnun sem miðar að því að greina hvaða áhorfendur mæta á leiki í Pepsi-deild kvenna og jafnframt að greina upplýsingar um hvers vegna aðrir mæta ekki á leiki deildarinnar.

Þá er ljóst að hvert félag í Pepsi-deild mun skipa markaðsfulltrúa sem mun verða ábyrgur fyrir markaðs- og kynningarstarfi (auglýsingum og fleiru) hjá hverju félagi.  Eina markmið markaðsfulltrúans verður að fá fleiri áhorfendur á leiki síns félags.

Undirbúnings- og greiningarvinnu mun ljúka í október og þá mun áætlun jafnframt liggja fyrir.  Innleiðing verkefnisins hefst síðan á fyrstu mánuðum ársins 2013.

• Fræðsla