A kvenna - Stelpurnar farnar til Búlgaríu
Kvennalandsliðið hélt í morgun til Búlgaríu þar sem leikið verður við heimastúlkur í undankeppni EM á fimmtudaginn. Leikið verður í Lovech í Búlgaríu og hefst leikurinn kl. 15:00 að íslenskum tíma.
Það voru 18 leikmenn sem héldu til Búlgaríu, þeir sömu og voru á leikskýrslu í sigurleiknum gegn Ungverjalandi síðastliðinn laugardag. Íslenska liðið er í efsta sæti riðilsins, einu stigi á undan Norðmönnum og tveimur á undan Belgum. Norðmenn leika einnig á fimmtudaginn, leika þá á heimavelli gegn Norður Írum.
