U17 kvenna - Leikið við Dani á sunnudag og þriðjudag
Framundan eru tveir vináttulandsleikir gegn Dönum hjá U17 kvenna og fara báðir leikirnir fram í Egilshöll. Fyrri leikurinn verður sunnudaginn 18. mars og hefst kl. 11:45, en ekki kl. 12:00 eins og áður var fyrirhugað. Sá síðari verður þriðjudaginn 20. mars og hefst kl. 18:00.
Þessir leikir eru góður undirbúningur fyrir keppni í milliriðlum EM en þar verða báðar þjóðirnar í eldlínunni. Íslensku stelpurnar leika í Belgíu, dagana 13. - 18. apríl. Þar eru þær í riðli með Englandi, Sviss og heimastúlkum. Danska liðið verður seinna á ferðinni, leikur í sínum riðli á heimavelli dagana 26. apríl - 1. maí. Mótherjar þeirra verða: Finnland, Holland og Svíþjóð.
Eitt lið úr hverjum riðli fer svo í úrslitakeppnina sem að venju er leikin í Nyon í Sviss en þar var Ísland á meðal þátttakenda á síðasta ári. Einungis fjórar þjóðir komast í úrslitakeppnina og verður svo í ár sem og árið 2013. Frá og með árinu 2014 munu 8 þjóðir leika í úrslitakeppninni.
Danir hafa tilkynnt hóp sinn og má sjá hann hér að neðan.
Við hvetjum allt knattspyrnuáhugafólk til að koma í Egilshöllina og hvetja stelpurnar í skemmtilegum leikjum.
