A karla - Sigurmark Svartfellinga í lokin
Íslendingar biðu lægri hlut gegn Svartfellingum i vináttulandsleik þjóðanna sem fram fór í Podgorica í kvöld. Lokatölur urðu 2 - 1 fyrir heimamenn eftir að markalaust hafði verið í leikhléi. Alfreð Finnbogason skoraði mark Íslendinga og jafnaði þá metin.
Fyrri hálfleikur var vel leikinn af hálfu íslenska liðsins. Heimamenn byrjuðu betur en Íslendingar komust svo meira inn í leikinn og mættu heimamönnum framarlega á vellinum. Birkir Bjarnason var nálægt því í þrígang að skora í hálfleiknum en hafði ekki heppnina með sér. Markalaust var því þegar dómari leiksins, sem kom frá Bosníu/Hersegóvínu, flautaði til leikhlés.
Heimamenn voru sterkari aðilinn í síðari hálfleik og áttu sláarskot strax eftir 45 sekúndur. Íslenska liðið náði ekki tökum á leiknum eins og í fyrri hálfleiknum og Svartfellingar komust yfir á 56. mínútu. Eftir hraða sókn komust þeir upp vinstri kantinn og eftir fyrirgjöf skallaði Stevan Jovetic boltann í netið af markteig. Undirtökin voru ennþá heimamanna en á 79. mínútu jöfnuðu Íslendingar. Varamennirnir Aron Einar Gunnarsson og Alfreð Finnbogason áttu þar hlut að máli. Aron Einar sendi inn á Alfreð sem tók sér góðan tíma áður en hann skoraði með vinstri fæti í fjærhornið. Aðeins tveimur mínútum síðar var hann hársbreidd frá því að koma Íslendingum yfir með hægri fætinum. Gylfi komst inn í sendingu til marksmanns Svartfellinga við endalínu, sendi út á Alfreð sem átti skot í samskeytin. Boltinn hrökk út til Jóhanns Bergs sem skaut framhjá úr góðu færi. Sigurmarkið kom svo á 86. mínútu var þar Stevan Jovetic aftur á ferðinni með glæsilegu marki.
Nokkuð kaflaskiptur leikur, íslenska liðið hættulegri aðilinn í fyrri hálfleik en heimamenn töluvert sterkari í síðari hálfleik.
Næsta verkefni landsliðsins er svo vináttulandsleikur gegn Frökkum ytra, 27. maí og þremur dögum síðar verður leikið gegn Svíum.
