Leyfisferlið fyrir 2012 hafið
Samkvæmt leyfisreglugerð KSÍ hafa þeim félögum sem hyggjast sækja um þátttökuleyfi í Pepsi-deild og 1. deild karla 2012 verið sendar nauðsynlegar upplýsingar, áður en vinna við leyfisumsókn hefst.
Félög sem falla úr 1. deild 2011 eru varafélög ef félag í 1. deild 2012 skyldi ekki fá þátttökuleyfi. Sama gildir um félög sem falla úr Pepsi-deild 2011, þau eru varafélög fyrir Pepsi-deildina 2012. Því hefur Gróttu og HK einnig verið sent erindi vegna þessa, en þau félög féllu úr 1. deild. Þá hefur Njarðvík undirgengist leyfiskerfið skv. beiðni félagsins allt frá því félagið undirgekkst kerfið fyrst, þrátt fyrir að leika í 2. deild, og staðist með prýði, sem ber vitni um mikinn metnað.
Leyfisreglugerðin
Í leyfisreglugerðinni er að finna allar nauðsynlegar upplýsingar um allar forsendur sem þarf að uppfylla.
Leyfisfulltrúi
Hvert félag tilnefnir einn leyfisfulltrúa. Leyfisfulltrúi félagsins er sá aðili sem leyfisstjóri KSÍ hefur að mestu samskipti við vegna leyfiskerfisins og er sá aðili sem allar upplýsingar eru sendar á. Leyfisfulltrúi félagsins kemur skilaboðunum síðan áfram innan síns félags.
Trúnaður
KSÍ er bundið trúnaði gagnvart leyfisumsækjendum og er ekki heimilt að gefa óviðkomandi aðilum upp neinar upplýsingar úr leyfisgögnum leyfisumsækjenda, skv. trúnaðaryfirlýsingu þar um. Allir aðilar sem koma að leyfiskerfinu fyrir hönd KSÍ hafa undirritað slíka trúnaðaryfirlýsingu.
Lykildagsetningar
Skil á gögnum, öðrum en fjárhagslegum, eigi síðar en 15. janúar.
Fjárhagslegum gögnum skilað eigi síðar en 20. febrúar.
Ársreikningur verður því að vera staðfestur af aðalfundi í síðasta lagi 20. febrúar.
Fjárhagsleg leyfisgögn – FLG
Félög í Pepsi-deild þurfa fulla áritun endurskoðanda á ársreikning sinn, eins og áður. Félög í 1. deild þurfa könnunaráritun endurskoðanda á ársreikning sinn. Hvert félag þarf einnig að láta endurskoðanda ársreikningsins útbúa FLG, samkvæmt viðmiðunarreglum leyfisreglugerðarinnar, og byggja gögnin á endurskoðuðum ársreikningi. Minnt er á staðfestingar vegna engra vanskila við leikmenn, þjálfara og aðra, sem og staðfestingar vegna engra vanskila vegna félagaskipta leikmanna.
Leyfisvefurinn á ksi.is
Á vef KSÍ er sérstakur leyfisvefur þar sem finna má allar helstu upplýsingar, eyðublöð og gátlista, reglugerðina sjálfa, o.s.frv. Tengill á vefinn er ofarlega á ksi.is (smellið á Leyfiskerfi). Slóðin er annars þessi: http://www.ksi.is/leyfiskerfi/
Aðstoð á skrifstofu KSÍ
Leyfisstjóri verður til taks á skrifstofu KSÍ ef spurningar vakna. Hlutverk leyfisstjóra í þessu ferli er að halda utan um kerfið og aðstoða félögin við að útbúa leyfisumsókn. Ef leyfisstjóri kemur auga á eitthvað sem hann telur að gæti komið í veg fyrir veitingu þátttökuleyfis mun hann vinna með viðkomandi félagi að úrlausn málsins.
Skjöl á leyfisvefnum
Öll nauðsynleg skjöl og sniðmát er að finna á leyfisvefnum á ksi.is, undir Tækjakassi. Heiti skjalanna eru hluti af skjalastýringu leyfiskerfisins og á sumum stöðum í gátlista yfir allar forsendur má sjá tilvísanir í ákveðin skjöl. Þessi skjöl má sækja á leyfisvefinn.
.jpg?proc=760)
