NM U17 karla - Knattspyrnuveisla á Norðurlandi
Í dag hefst Norðurlandamót U17 karla og verður það leikið víðsvegar um Norðurland. Ísland er að þessu sinni með tvö lið í mótinu en aðrar þjóðir eru: Færeyjar, Noregur, Svíþjóð, Danmörk, Finnland og England. Leikirnir í dag fara allir fram á Akureyri, á Akureyrarvelli og Þórsvelli. Vakin er athygli á breyttri tímasetningu á leik Danmerkur og Finnlands en hann hefst kl. 19:00 í kvöld.
Einnig verður leikið á Ólafsfirði, Sauðárkróki, Húsavík og Dalvík. Næstu leikir mótsins fara fram á morgun, miðvikudag og síðasta umferð riðlakeppninnar fer svo fram á föstudaginn. Leikið verður svo um sæti sunnudaginn 7. ágúst og fara þeir leikir fram á Akureyri og á Grenivík.
Knattspyrnuáhugafólk er hvatt til þess að fjölmenna á þessa leiki og sjá knattspyrnustjörnur framtíðarinnar í hörkuleikjum.
