EM U17 kvenna - Bronsið til Þjóðverja
Það var þýska liðið sem tryggði sér þriðja sætið í úrslitakeppni EM U17 kvenna en leikið var um sæti í Nyon í dag. Þjóðverjar lögðu íslensku stelpurnar með átta mörkum gegn tveimur og gerðu þær þýsku út um leikinn í fyrri hálfleiknum en þær leiddu í leikhléi, 5 - 0.
Þýska liðið, sem margir töldu sigurstranglegasta liðið í keppninni, hafði öll tök á leiknum í fyrri hálfleiknum og skoruðu fyrsta markið á 12. mínútu. Fjögur mörk fylgdu í kjölfarið áður en dómari leiksins flautaði til leikhlés, það síðasta í uppbótartíma.
Þær íslensku bitu betur frá sér í síðari hálfleiknum en Þjóðverjar bættu sjötta markinu við úr vítaspyrnu áður en Telma Þrastardóttir kom íslenska liðinu á blað með marki á 48. mínútu. Tvö mörk Þjóðverja komu á tveimur mínútum um miðja síðari hálfleikinn en Aldís Kara Lúðvíksdóttir átti lokaorðið í leiknum og lokastaðan því 8 - 2.
Síðar í dag leika svo Spánn og Frakkland til úrslita en þó svo að hlutirnir hafi ekki gengið upp á stelpunum í þessari úrslitakeppni þá er árangur liðsins hreint stórkostlegur í þessari keppni. Mikilvæg reynsla hefur safnast í sarpinn hjá stelpunum sem væntanlega iða í skinninu eftir því að fá annað tækifæri í úrslitakeppni sem slíkri.
