EM U17 kvenna - Spánverjar of sterkir
Stelpurnar í U17 biðu lægri hlut gegn Spánverjum í undanúrslitum EM U17 kvenna en leikið var í Nyon í Sviss. Lokatölur urðu 4 - 0 fyrir Evrópumeistara Spánverja sem leiddu í leikhléi 3 - 0. Ísland mun því leika um 3. sætið á sunnudag en Spánverjar leika til úrslita á mótinu.
Spænska liðið tók völdin strax í byrjun og höfðu undirtökin allan fyrri hálfleikinn. Íslenska liðið komst aldrei í takt við leikinn og Spánverjar gengu til búningsherbergja með þriggja marka forystu.
Í síðari hálfleik gekk íslenska liðinu mun betur að stöðva sóknir spænska liðsins en náði ekki að ógna marki Spánar. Lokamarkið var sjálfsmark íslenska liðsins og Spánverjar fögnuðu því verðskulduðum sigri í leikslok og sæti í úrslitaleiknum.
Ísland mun því leika um 3. sætið á mótinu og mæta þar annað hvort Þýskalandi eða Frakklandi en þessar þjóðir eigast við síðar í dag. Sigurvegari þeirrar viðureignar mætir Spánverjum í úrslitaleiknum. Leikirnir um sætin fara fram á sunnudaginn og hefst leikurinn um 3. sætið kl. 12:00 að íslenskum tíma. Sá leikur verður í beinni útsendingu á íþróttastöðinni Eurosport.
