Norðurlandamót stúlkna - Franskur sigur þrátt fyrir frábæra byrjun
Íslensku stelpurnar léku sinn annan leik á Norðurlandamótinu í Finnlandi í dag. Mótherjarnir voru Frakkar sem höfðu 3 - 2 sigur í mjög kaflaskiptum leik. Íslenska liðið réð lögum og lofum í fyrri hálfleiknum og leiddi í leikhléi 2 - 0. Elín Metta Jensen kom Íslandi yfir á 10. mínútu og Hanna Kristín Hannesdóttir bættu við öðru marki á 27. mínútu.
Franska liðið gerði fjórar breytingar í leikhléi, mættu mjög ákveðnar til leiks og stjórnuðu seinni hálfleiknum algjörlega. Þær skoruðu 2 mörk á fyrstu fjórum mínútum seinni hálfleiks og bættu við sigurmarkinu á 60. mínútu. Íslenska liðið sótti nokkuð í sig veðrið undir lok leiksins en það voru Frakkar sem fögnuðu sigri í leikslok.
Íslenska liðið gerði jafntefli gegn Þjóðverjum í fyrsta leik sínum. Síðasti leikur liðsins í riðlakeppninni er á fimmtudaginn þegar Norðmenn verða andstæðingarnir. Sá leikur hefst kl. 12:00 að íslenskum tíma. Leikið verður svo um sæti á laugardaginn.
.jpg?proc=760)
.jpg?proc=760)
