U21 karla - Leikið gegn Sviss í dag
Strákarnir í U21 leika í dag sinn annan leik í úrslitakeppni EM sem fram fer í Danmörku. Leikið verður í dag gegn Sviss í Álaborg og hefst leikurinn kl. 16:00 að íslenskum tíma og verður í beinni útsendingu hjá Ríkissjónvarpinu.
Íslendingar töpuðu gegn Hvít Rússum í sínum fyrsta leik á meðan Sviss bar sigurorð af heimamönnum í hörkuleik. Það verður því allt lagt í sölurnar í Álaborg í dag og má búast við mikilli baráttu.
Aron Einar Gunnarsson verður í leikbanni í þessum leik vegna rauða spjaldsins sem hann fékk gegn Hvít Rússum. Þá er óvíst með þátttöku Jóhanns Bergs Guðmundssonar sem að varð fyrir meiðslum í sama leik. Annars fer vel um hópinn í Álaborg en töluvert rigndi þar í borg í gær og er einhver væta í dönskum veðurkortum einnig í dag.
Nú er bara að senda alla jákvæða orku og strauma til strákanna í dag.
Áfram Ísland!
