U17 kvenna - Stelpurnar komnar í úrslitakeppnina
Stelpurnar í U17 gerðu sér lítið fyrir í dag og tryggðu sér sæti í úrslitakeppni EM sem fram fer í lok júlí. Leikið var við Pólverja í dag og eftir markalausan fyrri hálfleik skoruðu íslensku stelpurnar tvö mörk í síðari hálfleiknum, líkt og gegn Englendingum, og tryggðu sér sigurinn. Þrátt fyrir að ein umferð sé eftir í milliriðlinum þá hafa stelpurnar tryggt sér efsta sætið í riðlinum með sex stig. Pólland og England hafa þrjú stig og geta náð íslenska liðinu að stigum en sigur Íslands á þessum þjóðum tryggir þeim efsta sætið á innbyrðis viðureignum.
Eftir markalausan fyrri hálfleik þá kom Guðmunda Brynja Óladóttir Íslandi yfir á 56. mínútu og Telma Þrastardóttir bætti við öðru marki á 69. mínútu. Þar við sat og íslenska liðið fagnaði vel í leikslok og ekki síður þegar fréttir bárust af því að England hafði unnið Svía. Þar með var ljóst að efsta sæti riðilsins var Íslands og sæti í úrslitakeppninni tryggt.
Úrslitakeppnin fer fram í Nyon í Sviss, dagana 28. - 31. júlí en aðeins eru fjórar þjóðir sem komast hana. Ísland mun leika í undanúrslitum gegn Spánverjum.
Þetta er frábær árangur hjá hópnum en liðið á enn einn leik eftir í riðlinum, leikið verður gegn Svíum fimmtudaginn 14. apríl.
.jpg?proc=760)
.jpg?proc=760)
