U17 kvenna - Enskar engin fyrirstaða
Stelpurnar í U17 hófu keppni í milliriðli EM á besta mögulegan máta en þær mættu stöllum sínum frá Englandi í dag. Lokatölur urðu 2 - 0 Íslandi í vil eftir að markalaust hafði verið í leikhléi.
Það voru þær Guðmunda Brynja Óladóttir og Elín Metta Jensen sem skoruðu mörk Íslands í leiknum en þær komu báðar inná sem varamenn. Mark Guðmundu kom eftir fimm mínútna leik í seinni hálfleik en mark Elínar þegar tvær mínútur voru komnar fram yfir venjulegan leiktíma.
Gríðarlega mikilvægt að byrja vel því einungis eitt lið fer í úrslitakeppnina úr riðlinum en hann er leikinn í Póllandi. Keppnin er hörð en hin liðin í riðlinum eru Svíþjóð og Pólland. Þessar þjóðir mættust einnig í dag og voru það heimastúlkur sem höfðu 3 - 1 sigur.
Ísland mætir Póllandi á mánudaginn og hefst leikurinn kl. 13:30 að íslenskum tíma.
Hægt er að sjá myndir og fá fréttir af liðinu á Facebooksíðu KSÍ.
.jpg?proc=760){kind=logo}
