Ánægjukönnun á meðal leyfisumsækjenda 2011
Að loknu leyfisferlinu á ári hverju fer fram svokallað árlegt endurmat, að kröfu UEFA, þar sem farið er yfir alla þætti kerfisins og skoðað hvað vel hefur gengið og hvað mætti betur fara.
Einn mikilvægur þáttur í þessu endurmati er að óska eftir upplýsingum frá leyfisumsækjendum um þessi atriði. Hvað fannst fulltrúum félaganna? Hvað var vel gert og hvað mætti betur fara?
Svör bárust frá 18 félögum af þeim 25 sem undirgengust leyfiskerfið að þessu sinni (öll félög í efstu deild karla og 1. deild karla undirgangast kerfið, auk Njarðvíkur í 2. deild karla) og hér að neðan er stiklað á stóru um helstu atriðin sem fram komu.
- Almenn ánægja er með þá þjónustu og þann stuðning sem leyfisstjórn KSÍ veitir leyfisumsækjendum.
- Fulltrúum félaganna finnst leyfiskerfið vera gott tæki til að hjálpa félögunum við starfið, gefur ákveðnar línur sem gott er að vinna eftir. Kerfið er strangt og erfitt, en skilar árangri og heldur félögunum á tánum. Mörgum finnst þetta vera komið í góða rútínu og vera orðinn fastur lykilpartur af starfinu yfir veturinn.
- Fimm félög óskuðu eftir því að gagnasöfnun væri einfölduð þannig að þau gögn sem eru auðveldlega aðgengileð á vefnum, t.d. á www.ksi.is þyrfti ekki að prenta út, setja í möppu og skila til leyfistjórnar.
- Eitt félag kvartaði undan kostnaði við læknisskoðun leikmanna og taldi kröfurnar of miklar.
- Einu félagi fannst óþarfi að félög í efstu deild þyrftu að fá fulla áritun endurskoðanda á ársreikninga sína, fannst fjárhagskröfurnar of stífar.
- Eitt félag kvartaði undan því að athugasemd um að tiltekinn þjálfari hefði ekki lokið tilskilinni endurmenntun hefði komið fram heldur seint í ferlinu, sem hefði gert félaginu erfitt um vik að bregðast nógu snögglega við. Staða á endurmenntun eða gildistími KSÍ-A/KSÍ-B þjálfaraskírteina ætti að vera sýnilegur í spjaldi viðkomandi þjálfara á vef KSÍ.
Leyfisstjórn þakkar leyfishöfum kærlega fyrir góða þátttöku í þessari könnun og mun taka allar ábendingar til skoðunar. Við sumum ábendingum hefur þegar verið brugðist.
.jpg?proc=760)
