Ísland hafnaði í 2. sæti í Futsal-riðlinum
Ísland hafnaði í 2. sæti riðilsins í forkeppni EM 2012 í Futsal, sem leikinn var að Ásvöllum. Sigur gegn Grikkjum í dag, mánudag, þýddi að íslenska liðið lauk keppni með 6 stig. Lettar unnu sigur í riðlinum með fullt hús, en Grikkir og Armenar fengu eitt stig hvort lið.
Grikkirnir skoruðu fyrsta mark leiksins og fögnuðu ógurlega, enda hafði þeim gengið heldur illa í keppninni. Íslendingar svöruðu hins vegar með mörkum frá Þórarni Inga Valdimarssyni og Tryggva Guðmundssyni og leiddu 2-1 í hálfleik. Merkilegt nokk er að Ísland leiddi 2-1 í öllum leikjum sínum í riðlinum. Gríska liðið hafði reyndar fengið nokkur góð færi í fyrri hálfleik og hefði, svo sanngirni sé gætt, hæglega getað skorað eitt til tvö mörk.
Næstu þrjú mörkin í leiknum voru íslensk og breyttu stöðunni í 5-1 fyrir Ísland, og allt útlit fyrir annan stórsigurinn í röð. Þórarinn Ingi skoraði fjórða mark sitt í keppninni, Þorsteinn Már Ragnarsson og Magnús Sverrir Þorsteinsson skoruðu hin. Grikkirnir gáfust hins vegar ekki upp, tóku áhættu og settu útileikmann inn á í stað markvarðar, og það skilaði þeim þremur mörkum á fjögurra mínútna kafla, öllum með langskotum frá Papadopoulos og staðan orðin, 5-4 þegar aðeins ein mínúta var eftir af leiknum. Það fór þó svo að íslenska vörnin hélt út og sigrinum var siglt í höfn.
Þessi frammistaða íslenska liðsins, í frumraun sinni í EM landsliða í Futsal, var framar vonum, verður að segjast. Glimrandi leikir hjá okkar strákum og greinilegt að Futsal-landsliðið er komið til að vera. Hver veit hvað hefði gerst ef tekist hefði að ná jöfnu gegn Lettum í fyrsta leik?
Tengill á leikskýrsluna á uefa.com
.jpg?proc=760)
.jpg?proc=760)
