Íslenskir dómarar á CORE námskeiði í Sviss
Þrír íslenskir dómarar eru þessa dagana í Sviss þar sem þeir sækja námskeið fyrir unga og efnilega dómara. Þetta er nýtt verkefni á vegum UEFA og kallast “CORE” (Centre Of Refereeing Excellence) Er hér um að ræða áætlun um þjálfun og menntun dómara á aldrinum 25. - 30 ára. Íslendingarnir sem eru nú í Sviss á þessu námskeiði eru: dómarinn Gunnar Jarl Jónsson og aðstoðardómararnir, Birkir Sigurðarson og Gylfi Már Sigurðsson.
Verða þeir í tvær vikur í Sviss við þjálfun og kennslu sem og þeir starfa við dómgæslu í deildarkeppni í Sviss. Þeir munu svo sækja annað námskeið í júní á næsta ári.
