KSÍ VI þjálfaranámskeið í Englandi í janúar 2011

KSÍ heldur VI. stigs þjálfaranámskeið í Wokefield Park, Englandi dagana 9.-16. janúar 2011.  Reiknað er með að fleiri þjálfarar sæki um námskeiðið en hægt er að taka inn.  Umsækjendur þurfa því að fylla út umsóknareyðublað sem finna má hér að neðan.  Umsækjendur verða að hafa lokið KSÍ V þjálfaranámskeiði eða verða að taka KSÍ V þjálfaranámskeið sem haldið verður helgina 5.-7. nóvember á þessu ári.

   .

KSÍ vekur athygli á því að síðasti dagur til að skila inn umsókninni er 13. október næstkomandi, en auðvitað má skila umsóknum fyrr. Þjálfarar sem hyggjast sækja um KSÍ VI en eiga eftir að taka KSÍ V verða að senda inn umsókn í síðasta lagi 13. október og skuldbinda sig þar með til að taka KSÍ V sem haldið verður helgina 5.-7. nóvember.

Líklegt námskeiðsgjald er 250.000 krónur.  Þegar nákvæmara verð liggur fyrir, verður það gefið út.

Hægt verður að skipta greiðslunni eitthvað niður eftir nánara samkomulagi við Pálma Jónsson fjármálastjóra KSÍ.

Fræðslunefnd KSÍ stefnir á að taka inn 26 þjálfara á námskeiðið, eftir fjölda og hæfni umsækjenda.

Á námskeiðinu er 100% mætingarskylda og það er bæði bóklegt og verklegt.  Þátttakendur þurfa að taka þátt í verklegum tímum.

KSÍ VI þjálfaranámskeiðið er hluti af UEFA A þjálfaragráðu.  Flesta dagana verður námskeiðið haldið í Wokefield Park.  Einum degi verður varið til heimsóknar í klúbb í ensku úrvalsdeildinni eða Championship deildinni þar sem skoðuð verður knattspyrnuakademía.  Einum degi verður varið í leikgreiningu á leik í ensku úrvalsdeildinni.

Á námskeiðinu kenna kennarar frá KSÍ og erlendir fyrirlesarar, væntanlega frá enska knattspyrnusambandinu.  Hluti námskeiðsins fer fram á ensku.

Skriflegt próf verður haldið 2-3 vikum eftir KSÍ VI námskeiðið.  Prófað verður úr námsefni KSÍ V og VI.

Dagskrá námskeiðsins er í vinnslu en þó er óhætt að upplýsa það að meðal fyrirlesara á námskeiðinu verða kennarar af UEFA Pro þjálfaranámskeiðinu í Englandi, svo sem Howard Wilkinson og John Peacock, fyrrum yfirmanni knattspyrnuakademíu Derby County, ásamt þeim Ólafi Helga Kristjánssyni, þjálfara Breiðabliks, Gunnari Guðmundssyni, þjálfara U17 ára liðs karla og Sigurði Ragnari Eyjólfssyni, þjálfara A-landsliðs kvenna.

Farið verður á einn af eftirtöldum leikjum í Ensku úrvalsdeildinni: Chelsea-Blackburn, Tottenham-Man. United eða West Ham-Arsenal. Einnig verður unglingaakademía félags í London heimsótt.

Nánari dagskrá á námskeiðinu verður gefin út þegar nær dregur.

Allar nánari upplýsingar um námskeiðið veitir Dagur Sveinn Dagbjartsson (dagur@ksi.is) og Sigurður Ragnar Eyjólfsson (siggi@ksi.is).

Umsóknareyðublað