Norðurlandamót U17 karla - Sigurmark Englands í uppbótartíma
Strákarnir í U17 tókust á við Englendinga í dag en þetta var lokaleikur liðsins í riðlakepni Norðurlandamótsins sem fram fer í Finnlandi. Lokatölur urðu 2 - 1 Englendingum í vil og kom sigurmark þeirra á lokasekúndum í uppbótartíma leiksins.
Um var að ræða hörkuleik hjá strákunum og besta leik liðsins til þessa í mótinu. Staðan var markalaust í leikhléi en Englendingar komust yfir í byrjun seinni hálfleiks. Oliver Sigurjónsson jafnaði metin á 56. mínútu og var þetta fyrsta markið sem England fær á sig í mótinu. Þegar örfáar sekúndur voru í að flautað var til leiksloka tryggðu Englendingar sér sigur, mikil vonbrigði eftir góðan leik strákanna.
Leikið verður um sæti á sunnudaginn en ekki er ljóst, þegar þetta er skrifað, um hvaða sæti Íslendingar leika ná hverjir mótherjarnir verða þá.
