mið. 14. júl. 2010
Fræðsla

Bagg er bögg – Átaksverkefni gegn munntóbaksnotkun

KSÍ, Jafningjafræðslan og Lýðheilsustöð hafa snúið bökum saman í baráttunni gegn notkun munntóbaks undir slagorðinu „Bagg er bögg“. Átakinu er ætlað að sporna við aukinni munntóbaksnotkun hjá ungu fólki, þar sem áhersla er lögð á unga knattspyrnuiðkendur. Verkefnið var kynnt á blaðamannafundi í höfuðstöðvum KSÍ í dag.

Upplýsingar um skaðsemi munntóbaks er að finna á vef Lýðheilsustöðvar: http://www.lydheilsustod.is/munntobak

Bagg er bögg – Sérstaklega í boltanum

Hópþrýstingur spilar oft stórt hlutverk þegar fólk byrjar að „bagga“. Að geta sagt „nei“ við einhverju sem maður fílar ekki sýnir sjálfstæða hugsun og sterkan karakter.
Margir ætla bara að „hætta þegar þeir verða háðir“... en það er ekkert grín að losa sig undan fíkninni því munntóbak er mjög ávanabindandi. Í því er fjórum sinnum meira magn af nikótíni heldur en í sígarettum og flestir vita hvað þær eru ávanabindandi.
Þeir sem bagga daglega eru að meðaltali með tóbakið upp í sér í 12 tíma á sólarhring – margir ganga jafnvel svo langt að sofa með það og vakna oft á tíðum með tóbak í kokinu eða út um allan munn.
Í munntóbaki eru 28 krabbameinsvaldandi efni. Sumar rannsóknir benda til að langvarandi regluleg notkun auki m.a. líkur á krabbameini í munnholi og brisi.
Við munntóbaksnotkun gulna tennur, tannhold bólgnar og gómar rýrna. Þá fylgir þessu líka tannlos og andfýla, auk þess sem bragð- og lyktarskyn minnkar. Í ofanálag sýrir tóbakið í gegnum tannholdið svo holur geta myndast. Harðkjarna baggarar geta jafnvel potað í augun á sér í gegnum munninn!
Sá sem er orðinn háður munntóbaki verður háður nikótíninu bæði líkamlega, andlega og félagslega. Notandinn verður stöðugt að fá nýjan skammt af nikótíni til að vera í andlegu og líkamlegu jafnvægi.
Það einkennir mjög fíknina að notandinn „verður“ að fá efnið þótt hann „vilji“ það ekki. Margir sem eru háðir munntóbaki hafa löngun til að hætta að nota það.
Sjúskaða hamstralúkkið er orðið vægast sagt mjög þreytt.
Fáðu hjálp við að hætta að bagga í reyksímanum: 800 6030