Hundraðasti landsleikur Katrínar Jónsdóttur
Katrín Jónsdóttir, landsliðsfyrirliði, leikur sinn 100. landsleik gegn Króatíu þegar þjóðirnar mætast í undankeppni HM á Laugardalsvelli á morgun. Katrín er leikjahæst allra landsliðskvenna frá upphafi og er annar íslenski landsliðsmaðurinn í knattspyrnu sem rýfur 100 leikja múrinn en Rúnar Kristinsson lék 104 landsleiki.
Landsliðsferill Katrínar hófst 9. maí árið 1994 þegar hún kom inná sem varamaður í vináttulandsleik gegn Skotum sem fram fór í Glasgow. Það er óhætt að segja að farsæll landsliðsferill Katrínar hafi farið vel af stað því að íslenska liðið vann Skota, 4 – 1. Tveimur árum áður lék hún sinn fyrsta U17 landsleik en hún lék 11 slíka landsleiki og 27 U21 landsleiki. Það er svo félagi Katrínar í landsliðinu, Edda Garðarsdóttir, sem hefur leikið næstflestu A landsleikina eða 81 talsins.
Í leikjunum 99 sem Katrín hefur leikið hingað til hefur hún skorað 17 mörk, nú síðast stangaði hún knöttinn í netið í leik gegn Norður Írum síðastliðinn laugardag. Fyrsta landsliðsmarkið kom hinsvegar í leik gegn Hollandi, 5. júní 1996, en sigur vannst í þeim leik, 2 – 0.
Katrín er sannur leiðtogi, jafnt innan vallar sem utan og er frábær fyrirmynd fyrir unga knattspyrnuiðkendur. Við hvetjum knattspyrnuáhugafólk að fjölmenna á Laugardalsvöllinn til þess að hvetja stelpurnar til sigurs gegn Króötum sem og að hylla Katrínu Jónsdóttur í sínum hundraðasta landsleik.
Myndir: Á efstu myndinni sést Katrín fagna marki gegn Slóvenum á Laugardalsvelli árið 2008. Á annarri myndinni er Katrín fyrir miðri mynd að fagna sigri á Hollendingum árið 1994 en þetta var annar landsleikur Katrínar. Á neðstu myndinni er Katrín með knöttinn í leik gegn Tékkum á Laugardalsvelli árið 2006.
.jpg?proc=760)
.jpg?proc=760)
