26 manna landsliðshópur Andorra tilkynntur
Landsliðshópur Andorra hefur verið tilkynntur fyrir tvo vináttulandsleiki um mánaðamótin maí/júní. Alls hafa 26 leikmenn verið valdir í hópinn fyrir leikina tvo - gegn Íslandi á Laugardalsvelli 29. maí og gegn Albaníu í Tirana 2. júní.
Í hópnum er blanda af mjög reyndum landsliðsmönnum sem hafa leikið fleiri tugi leikja og ungra leikmanna sem eru að stíga sín fyrstu skref með liðinu. Flestir leikmannanna leika með félagsliðum í heimalandinu, en 8 leika þó með spænskum neðrideildarliðum.
Leikjahæstur er Oscar Sonejee Masand, 34 ára gamall, en hann hefur leikið 81 leik. Í hópnum eru svo 8 nýliðar. Lykilmaður liðsins er án efa varnarjaxlinn Ildefons Lima Sola, sem leikur með svissneska liðinu AC Bellinzona. Lima Sola lék 24 leiki með Bellinzona á síðustu leiktíð og fékk 12 gul spjöld og eitt rautt. Á myndinni hér að ofan má einmitt sjá hann í hressilegri tæklingu.
Leikur Íslands og Andorra fer sem fyrr segir fram á Laugardalsvelli laugardaginn 29. maí og hefst kl. 16:00. MIðasala á leikinn er þegar hafin.
