Sætur sigur á Serbíu
Íslenska kvennalandsliðið vann ákaflega sætan sigur á Serbíu í undankeppni HM 2011 en leikið var í Banatski Dvor. Lokatölur urðu 2 - 0 Íslandi í vil eftir að markalaust hafði verið í hálfleik. Það var Hólmfríður Magnúsdóttir sem skoraði bæði mörk Íslands.
Íslenska liðið hafði undirtökin allan leikinn og fékk nokkur góð færi í fyrri hálfleik en náði ekki að brjóta ísinn. Okkar stelpur héldu áfram pressunni í seinni hálfleik og á 53. mínútu var það Hólmfríður Magnúsdóttir sem kom boltanum í netið en hún fékk góða sendingu frá Sif Atladóttur og skoraði örugglega.
Hólmfríður var aftur á ferðinni sex mínútum fyrir leikslok þegar hún gerði út um leikinn með góðu skoti í fjærhornið. Tuttugasta mark Hólmfríðar í 55 landsleikjum sem er frábær árangur hjá "vinstri bakverði".
Stelpurnar halda núna til Króatíu þar sem leikið verður við heimastúlkur á miðvikudaginn. Króatía tapaði, frekar óvænt, gegn Eistlandi í dag með þremur mörkum gegn engu og koma því vafalaust grimmar til leiks. Efsta lið riðilsins, Frakkland, vann Norður Íra í dag með sex mörkum gegn engu.
Vert er að benda á að netmiðilinnn mbl.is var með beina textalýsingu af leiknum gegn Serbíu og mun fylgja liðinu til Króatíu.
