Markalaust jafntefli gegn Mexíkó í Charlotte
Ísland og Mexíkó gerðu markalaust jafntefli í vináttulandsleik sem fór fram í nótt en leikið var á Bank of America vellinum í Charlotte. Hið unga íslenska lið gaf Mexíkóum ekkert eftir og gáfu fá færi á sér. Stemningin á vellinum var eins og best verður á kosið, 63.227 manns mættu á völlinn og voru vel með á nótunum.
Eins og búast mátti við voru "heimamenn" meira með boltann í leiknum en íslensku strákarnir voru þó óhræddir við að sækja, sérstaklega í fyrri hálfleik. Ekki var mikið um opin marktækifæri í leiknum en Mexíkóar sóttu töluvert á lokakaflanum og áttu m.a. skot í þverslána. Jafntefli eru virkilega góð úrslit og leikurinn og umgjörð hans í heild sinni, mikil og góð reynsla fyrir liðið.
Gunnar Örn Jónsson lék sinn fyrsta landsleik þegar hann kom inná á 87. mínútu leiksins.
Í heild var leikurinn ágætasta skemmtun fyrir áhorfendur, þrátt fyrir markaleysið, en rúmlega 60 Íslendingar voru á vellinum og létu ekki sitt eftir liggja á þessum glæsilega leikvangi.
.jpg?proc=760)
.jpg?proc=760)
