Lokaskiladagur fjárhagsgagna runninn upp
Nú er runninn upp lokaskiladagur fjárhgslegra leyfisgagna vegna umsókna um þátttökuleyfi í Pepsi-deild karla og 1. deild karla. Sex félög hafa þegar skilað gögnum af 24 leyfisumsækjendum, allt félög í Pepsi-deild (Stjarnan, Valur, Breiðablik, FH, Keflavík og Grindavík), þannig að 18 félög eiga enn eftir að skila.
Einhverjum kann að finnast þetta vera mörg félög, en staðreyndin er hins vegar sú að samkvæmt venju berst lang stærstur hluti fjárhagsgagna á lokadegi. Í leyfisferlinu 2009 skiluðu t.d. 20 af þeim 25 félögum sem undirgengust leyfiskerfið á síðasta skiladegi. Fylgst verður með stöðu mála hér á ksi.is í dag.
Rétt er að fram komi að félög sem skila gögnum með pósti geta sett gögnin í póst í dag og teljast þau þá hafa skilað innan tímamarka, svo fremi sem póststimpillinn sýni 22. febrúar sem sendingardag.
Fjárhagsgögnum fylgja fjölmargar staðfestingar, s.s. á því að engin vanskil séu við leikmenn, þjálfara og aðra starfsmenn, sem og við önnur knattspyrnufélög vegna félagaskipta.
Minnt er á neðangreint ákvæði í leyfisreglugerð.
b) Tímamörk ekki uppfyllt.
Ef leyfisumsækjandi uppfyllir ekki sett tímamörk um framlagningu leyfisgagna skal hann sæta viðurlögum. Við ákvörðun þeirra skal taka mið af því hve alvarlegt brotið er. Eftirfarandi viðurlögum er hægt að beita:
- Viðvörun og sekt; við fyrsta brot skal beita dagsektum að upphæð kr 1.500 fyrir hvern dag sem líður þangað til viðeigandi gögnum hefur verið skilað, að hámarki kr 30.000.
- Áminning og sekt; við ítrekað brot skal skal beita dagsektum að upphæð kr 3.000 fyrir hvern dag sem líður þangað til viðeigandi gögnum hefur verið skilað, að hámarki kr 60.000.
- Stigatap; við alvarlegt og ítrekað brot er jafnframt heimilt að draga allt að 3 stig frá félaginu í deildarkeppninni.
Ítrekunarkvöð fellur niður ef tímamörk hafa verið uppfyllt í 3 ár samfleytt.
.jpg?proc=760)
