Jörðin snýst um sólina við Gróttu
Í rauðbláu húmi sólin sest niður
yfir sjónum er miðnæturfriður
þar er vitinn sem vakir allar nætur.
Varlega aldan snerti okkar fætur.
Sporin í sandinum hverfa eins og árin
eins hefur gróið yfir gömlu sárin.
Og jörðin hún snýst um sólina, alveg eins og ég
og jörðin hún snýst um sólina, alveg eins og ég.
Svona söng Bubbi Morthens í lagi sínu "Við Gróttu".
Það er aðeins eitt félögunum 24 í efstu tveimur deildum karla 2010 sem hefur aldrei áður undirgengist leyfiskerfi KSÍ, en það er Grótta, sem hefur nú skilað leyfisgögnum í fyrsta sinn. Þar með eiga aðeins fimm félög í 1. deild eftir að skila gögnum - HK, ÍA, Leiknir R., Víkingur R. og Þróttur R.
Lokaskiladagur þessara gagna er í dag, föstudaginn 15. janúar. Fylgist með réttum af skilum hér á ksi.is. Fjárhagslegum gögnum er síðan skilað eigi síðar en 20. febrúar.
Þau gögn sem leyfisumsækjendur eiga að skila eigi síðar en 15. janúar snúa að knattspyrnulegum þáttum (þjálfun og uppeldi ungra leikmanna), mannvirkjaþáttum (eignarréttur aðstöðu eða samningur um notkun, aðstaða áhorfenda, fjölmiðla og iðkenda), starfsfólki og stjórnun (starfslýsingar, ráðningarsamningar, menntun og reynsla) og lagalegum forsendum (lagalegur grundvöllur félags).
Minnt er á neðangreint úr leyfisreglugerðinni:
b) Tímamörk ekki uppfyllt.
Ef leyfisumsækjandi uppfyllir ekki sett tímamörk um framlagningu leyfisgagna skal hann sæta viðurlögum. Við ákvörðun þeirra skal taka mið af því hve alvarlegt brotið er. Eftirfarandi viðurlögum er hægt að beita:
- Viðvörun og sekt; við fyrsta brot skal beita dagsektum að upphæð kr 1.500 fyrir hvern dag sem líður þangað til viðeigandi gögnum hefur verið skilað, að hámarki kr 30.000.
- Áminning og sekt; við ítrekað brot skal skal beita dagsektum að upphæð kr 3.000 fyrir hvern dag sem líður þangað til viðeigandi gögnum hefur verið skilað, að hámarki kr 60.000.
- Stigatap; við alvarlegt og ítrekað brot er jafnframt heimilt að draga allt að 3 stig frá félaginu í deildarkeppninni.
Ítrekunarkvöð fellur niður ef tímamörk hafa verið uppfyllt í 3 ár samfleytt.
.jpg?proc=760)
