Dregið í riðla hjá U17 og U19 kvenna í næstu viku
Næstkomandi þriðjudag verður dregið í undankeppni U17 og U19 kvenna fyrir EM 2010/2011 og verður dregið í höfuðstöðvum UEFA. Á miðvikudaginn verður svo dregið í milliriðla fyrir keppnir 2009/2010 þessara aldurflokka en Ísland er í pottinum hjá U19 kvenna.
Fanndís Friðriksdóttirk, fyrirliði U19 kvenna sem tók þátt í úrslitakeppninni í Hvíta Rússlandi í sumar, mun taka við háttvísisverðlaunum UEFA við þetta tilefni. Fanndís mun einnig aðstoða UEFA við sjálfan dráttinn.
Þjóðunum er skipt í fjóra flokka fyrir dráttinn hjá U19 kvenna og er Ísland í þriðja flokki. Riðlarnir verða skipaðir einni þjóð úr hverjum flokki og eru flokkarnir þannig skipaðir:
Flokkur A: Þýskaland, Frakkland, Ítalía, Danmörk, Írland og Spánn
Flokkur B: Rússland, Noregur, Holland, Belgía, Ungverjaland og Svíþjóð
Flokkur C: Pólland, Sviss, Ísland, England, Aserbaíjan og Skotland
Flokkur D: Tékkland, Austurríki, Finnland, Bosnía-Hersegóvína, Tyrkland og Serbía
