Vilt þú fara á UEFA Pro námskeið?
Líkt og í fyrra býðst þjálfurum hér á landi að senda inn umsókn á UEFA Pro þjálfaranámskeið í Englandi. Pro þjálfaragráðan er viðurkennd í öllum löndum Evrópu, er æðsta stig þjálfaramenntunar sem UEFA samþykkir og veitir réttindi til að þjálfa öll lið í öllum deildum í Evrópu. KSÍ er heimilt að senda tvær umsóknir til Englands en enska knattspyrnusambandið mun velja inn á námskeiðið um miðjan janúar.
Tveir íslenskir þjálfarar hafa lokið Pro Licence gráðu enska knattspyrnusambandsins. Sigurður Ragnar Eyjólfsson, fræðslustjóri KSÍ, lauk við Pro gráðuna sumarið 2008 og Guðjón Þórðarson lauk við Pro gráðuna í sumar. Að auki lauk Atli Eðvaldsson UEFA Pro gráðu þýska knattspyrnusambandsins á þessu ári. Tveir þjálfarar til viðbótar, þeir Willum Þór Þórsson og Þorvaldur Örlygsson, eru á Pro námskeiðinu sem er í gangi og munu væntanlega útskrifast næsta sumar. Upplýsingar um námskeiðið og umsóknarferlið má finna með því að smella á tengilinn hér að neðan og skoða viðkomandi skjal. Umsóknarfrestur er til 29. desember. Nánari upplýsingar veitir Sigurður Ragnar Eyjólfsson í síma 510-2978 eða siggi@ksi.is.
.jpg?proc=760)
