Jafntefli í vináttulandsleik við Lúxemborg
Íslendingar gerðu jafntefli í kvöld við Lúxemborg en leikið var á Josy Barthel vellinum í Lúxemborg. Lokatölur urðu 1 -1 eftir að staðan hafði verið markalaus í leikhléi. Það var Garðar Jóhannsson sem skoraði mark Íslendinga í leiknum.
Það er óhætt að segja að fyrri hálfleikur hafi verið í rólegri kantinum, hvorugt liðið tók mikla áhættu í sóknarleik sínum og engin opin marktækifæri létu á sér kræla. Síðari hálfleikur var mun opnari og var íslenska liðið ágengara upp við mark heimamanna. Það bar svo árangur á 63. mínútu þegar Garðar Jóhannsson skallaði inn af harðfylgi aukaspyrnu Emils Hallfreðssonar. Varnarmaður heimamanna hékk í Garðari en hann lét það ekki á sig fá og kom boltanum í netið.
Heimamenn jöfnuðu svo metin á 75. mínútu og þrátt fyrir ágætar tilraunir tókst Íslendingum ekki að tryggja sér sigur í leiknum. Þetta er í þriðja sinn sem þjóðirnar gera jafntefli í sjö viðureignum en Íslendingar hafa unnið fjórum sinnum.
