Jafntefli hjá stelpunum í U19 gegn Sviss
Stelpurnar í U19 gerðu í dag jafntefli gegn stöllum sínum frá Sviss en leikurinn er í riðlakeppni EM U19 kvenna og er leikið í Portúgal. Lokatölur urðu 1 - 1 en þannig var staðan í hálfleik.
Sviss komst yfir strax á þriðju mínútu en Katrín Ásbjörnsdóttir jafnaði metin fimm mínútum síðar. Fyrri hálfleikurinn var í nokkru jafnvægi en íslenska liðið ógnaði meira, áttu m.a. skot í þverslá og mark var dæmt af vegna rangstæðu.
Í síðari hálfleik var svissneska liðið skeinuhættara en mörkin urðu ekki fleiri. Besta færið kom á 88. mínútu þegar að Sviss fékk dæmda vítaspyrnu en hún nýttist ekki og gott jafntefli staðreynd.
Síðasti leikurinn hjá stelpunum er gegn Rúmeníu næstkomandi fimmtudag en Rúmenar töpuðu fyrsta leik sínum í riðlinum gegn Sviss, 0 - 5. Portúgal og Rúmenía leika síðar í kvöld í riðlinum. Tvær efstu þjóðirnar komast áfram upp úr riðlinum og stendur Ísland því ágætlega að vígi fyrir lokaumferðina.
.jpg?proc=760)
.jpg?proc=760)
