Ekkert stöðvar Þjóðverjana
Þýska kvennalandsliðið í knattspyrnu virðist vera óstöðvandi. Þær þýsku tryggðu sér á fimmtudag sjöunda Evrópumeistaratitil sinn með 6-2 sigri á Englendingum á Ólympíuleikvanginum í Helsinki í Finnlandi.
Enska liðið hefur komið nokkuð á óvart á þessu móti og hefur leikið vel. Margir sparkspekingar héldu jafnvel að England myndi standa í Þýskalandi í úrslitaleiknum. Sú varð raunin, fyrsta klukkutímann.
Þjóðverjar náðu tveggja marka forystu áður en Englendignar minnkuðu muninn um miðjan fyrri hálfleik og þannig var staðan í hálfleik. Fljótlega eftir hlé juku Þjóðverjar forystuna að nýju, en aftur minnkuðu Englendingar muninn. Eftir klukkutíma leik setti þýska liðið hins vegar í fluggír og þær ensku áttu ekki nokkra möguleika. Lokatölur leiksins urðu því 6-2 Þýskalandi í vil, og fimmti Evrópumeistaratitill Þjóðverja í röð því staðreynd.
