Jafntefli í bráðfjörugum leik gegn Norðmönnum
Íslendingar og Norðmenn gerðu jafntefli í kvöld á Laugardalsvellinum og lauk þar með íslenska liðið keppni í undankeppni HM 2010. Lokatölur urðu 1 - 1 og komu bæði mörkin í fyrri hálfleik.
Það er langt síðan að íslenska liðið hefur skapað sér jafnmörg góð marktækifæri eins og það gerði í kvöld. Markið varð hinsvegar aðeins eitt og skoraði Eiður Smári Guðjohnsen það á 29. mínútu og jafnaði þar með metin en Norðmenn komust yfir á 11. mínútu með marki beint úr aukaspyrnu. Mark Eiðs Smára kom eftir frábæra sókn sem endaði með því að Eiður skallaði í markið sendingu frá Grétari Rafni. Íslenska liðið var töluvert sterkari aðilinn langmestan hluta leiksins og virtust koma Norðmönnum í opna skjöldu með vel útfærðum sóknarleik sínum.
Íslensku strákarnir enduðu þessa riðlakeppni með frábærum hætti þó svo að leikmenn og áhorfendur hafi verið vonsviknir með eitt stig í leikslok. Ísland endaði í neðsta sæti riðilsins þar sem Hollendingar voru í sérflokki en hinar fjórar þjóðirnar í einum hnapp þar á eftir.
Þó svo að riðlakeppni HM 2010 sé lokið er stutt í næsta verkefni hjá íslenska liðinu. Georgíumenn mæta á Laugardalsvöllinn, miðvikudaginn 9. september kl. 19:30 og leika þá vináttulandsleik gegn Íslendingum. Frítt er inn á leikinn fyrir yngri iðkendur aðildarfélaga sem og ellilífeyrisþega og öryrkja. Hægt er að sjá annars staðar hér á síðunni hvernig má nálgast þessa miða.
