Allir þrír hittu slána
Í hálfleik á leik Íslands og Noregs á laugardag fengu þrír heppnir vallargestir að spreyta sig á litlum leik. Leikurinn fólst í því að reyna að hitta markslána frá vítateig, í einni tilraun, og vinningurinn var ekki af verri endanum - flugferð fyrir tvo til útlanda, til áfangastaðar Icelandair.
Til að gera langa sögu stutta, þá gerðist hið ótrúlega og allir þrír hittu slána við gríðarlegan fögnuð áhorfenda á Laugardalsvelli! Hreint út sagt ótrúlegt ævintýri fyrir þessa aðila.
Rögnvaldur Þorgrímsson, 15 ára, var fyrstur og setti boltann í slána eins og að drekka vatn. Næstur var hinn 12 ára Óliver Gylfason sem sýndi fádæma góða spyrnutækni go aftur small bolrinn í slánni. Síðastur var svo aldursforsetinn, hinn fertugi Jón Karlsson, sem hreinlega hamraði knöttinn í slána.
Áhorfendur á vellinum sátu eftir furðu lostnir yfir þessu öllu saman og fögnuðu þessum kempum gríðarlega þegar þeir gengu af velli, sælir og glaðir.
