Getur þú hitt þverslána frá vítateigslínu?
Í hálfleik á viðureign Íslands og Noregs í undankeppni HM 2010, sem fram fer á laugardag, munu þrír heppnir vallargestir Laugardalsvallar fá tækifæri til að spreyta sig í erfiðri þraut.
Þrautin felst í því að spyrna knetti frá vítateigslínu með það fyrir augum að hitta þverslána. Hver og einn af þessum þremur fær aðeins eina tilraun, og vinningurinn ef það tekst er af glæsilegri tegundinni - ferð fyrir tvo til útlanda með Icelandair!
Þessir þrír aðilar voru dregnir út af handahófi í gegnum miðasölukerfi Miða.is. Haft var samband við þá á föstudag og allir eru þeir klárir í slaginn á laugardag.
Aðeins var dregið úr seldum miðum, þannig að þeir sem fengu miða eftir öðrum leiðum (heiðursstúka, fjölmiðlar, samstarfsaðilar KSÍ), voru ekki í pottinum.
Síðast þegar þetta var gert, á leik Íslands og Hollands í júní á þessu ári, vann einn heppinn (nema þetta hafi ekki verið grís) þátttakandi ferð fyrir tvo til Bandaríkjanna með því að hitta slán í þessari einu tilraun sinni. Hvað gerist á laugardag ... ?
